ប្រែសម្រួល៖ ស-សម្បត្តិ
ប្រធានាធិបតីអ៊ុយក្រែន វ៉ូឡូឌីមៀរ សេឡេនស្គី នឹងជួបជាមួយមេដឹកនាំអឺរ៉ុបនៅក្នុងកិច្ចប្រជុំកំពូលដ៏សំខាន់នៅទីក្រុងឡុងដ៍នៅថ្ងៃអាទិត្យ បន្ទាប់ពីការជជែកដ៏គួរឱ្យភ្ញាក់ផ្អើលរបស់លោកជាមួយប្រធានាធិបតីសហរដ្ឋអាមេរិក ដូណាល់ ត្រាំ នៅសេតវិមានបានធ្វើឱ្យសម្ព័ន្ធមិត្តលោកខាងលិចមានការភ្ញាក់ផ្អើល និងបានធ្វើឱ្យអនាគតនៃសង្គ្រាមរវាងរុស្ស៊ីនិងអ៊ុយក្រែនស្ថិតក្នុងភាពមិនប្រាកដប្រជាយ៉ាងខ្លាំង។
សេឡេនស្គីទទួលបានការស្វាគមន៍យ៉ាងកក់ក្ដៅពីនាយករដ្ឋមន្ត្រីអង់គ្លេស ឃៀ ស្តាមើរ កាលពីថ្ងៃសៅរ៍ ដែលមានភាពខុសគ្នាស្រឡះពីការទទួលដែលលោកបានជួបប្រទះនៅសេតវិមាន។ ព្រះមហាក្សត្រឆាលស៍ក៏បានទទួលយកការអញ្ជើញឱ្យជួបជាមួយសេឡេនស្គីនៅថ្ងៃអាទិត្យផងដែរ ដែលជាការប្រកាសរបស់មេដឹកនាំអ៊ុយក្រែន។
ប៉ុន្តែនៅចន្លោះពេលទាំងនេះ ថ្ងៃដ៏សំខាន់នៃការទូតកំពុងរំពឹងទុក។ លោកខាងលិចសង្ឃឹមថាកិច្ចប្រជុំកំពូលនៅថ្ងៃអាទិត្យនឹងជួយបង្កើតសន្ទុះឡើងវិញឆ្ពោះទៅរកកិច្ចព្រមព្រៀងសន្តិភាពដែលអាចទទួលយកបាន ដែលហាក់ដូចជាកំពុងកកើតមានយឺតៗនៅសប្តាហ៍នេះ ប៉ុន្តែបានរលាយបាត់ទៅវិញក្នុងរយៈពេលប៉ុន្មាននាទីដ៏អាក្រក់កាលពីថ្ងៃសុក្រ។
ស្តាមើរបានប្រាប់ BBC នៅព្រឹកថ្ងៃអាទិត្យថា លោកនឹងធ្វើការជាមួយបារាំង អ៊ុយក្រែន និង “ប្រហែលជាមួយឬពីរប្រទេសទៀត” លើផែនការដើម្បីបញ្ឈប់ការប្រយុទ្ធគ្នា ដែលលោកនឹងបង្ហាញទៅកាន់សហរដ្ឋអាមេរិកបន្ទាប់មក។
យុទ្ធសាស្ត្រនោះហាក់ដូចជាមានគោលបំណងប្រជែងនឹងដំណើរការចរចាដែលរដ្ឋបាលត្រាំបានបើកជាមួយរុស្ស៊ីកាលពីខែមុន និងបង្ហាញពីការទទួលយកដោយស្ងៀមស្ងាត់ថា ការនាំយកត្រាំនិងសេឡេនស្គីឱ្យមកអង្គុយនៅតុចរចាជាមួយគ្នានឹងជាបញ្ហាប្រឈមមួយ។
ជាក់ស្តែង មេដឹកនាំអ៊ុយក្រែននឹងត្រឡប់ទៅគៀវជាមួយនឹងភាពជាក់ស្តែងមួយចំនួន៖ កាលពីថ្ងៃសៅរ៍ លោកនិងស្តាមើរបានចុះហត្ថលេខាលើកិច្ចព្រមព្រៀងដើម្បីពន្លឿនប្រាក់កម្ចីចំនួន ២,៨ ពាន់លានដុល្លារទៅកាន់អ៊ុយក្រែន។ ការផ្តល់ប្រាក់កម្ចីដំណាក់កាលដំបូងត្រូវបានរំពឹងថានឹងត្រូវបើកផ្តល់នៅសប្តាហ៍ក្រោយ ដោយយោងតាមរដ្ឋាភិបាលចក្រភពអង់គ្លេស។
ក្នុងសារនៅលើ Telegram កាលពីថ្ងៃសៅរ៍ សេឡេនស្គីបាននិយាយថា “ប្រាក់នឹងត្រូវប្រើសម្រាប់ការផលិតអាវុធនៅក្នុងប្រទេសអ៊ុយក្រែន។ នេះគឺជាវិធីដ៏យុត្តិធម៌៖ អ្នកដែលចាប់ផ្តើមសង្គ្រាមគួរតែជាអ្នកបង់ប្រាក់។” លោកបានបន្ថែមថា “ប្រាក់កម្ចីនឹងពង្រឹងសមត្ថភាពការពាររបស់យើង។”
ទិដ្ឋភាពដែលបានកើតឡើងមុននេះ ដែលប្រធានាធិបតីអាមេរិកនិងអនុប្រធានាធិបតី បានស្តីបន្ទោសមេដឹកនាំនៃប្រទេសសម្ព័ន្ធមិត្តមួយដែលរងគ្រោះដោយសង្គ្រាម បានធ្វើឱ្យអឺរ៉ុបភ្ញាក់ផ្អើល និងបានធ្វើឱ្យក្រឹមឡាំងមានការរីករាយ។ វាបានបន្ថែមភាពតានតឹងដល់កិច្ចប្រជុំកំពូលនៅថ្ងៃអាទិត្យ ដែលដំបូងឡើយត្រូវបានកោះប្រជុំដោយស្តាមើរដើម្បីបន្តពីការរីកចម្រើនដែលសម្រេចបានក្នុងអំឡុងពេលកិច្ចប្រជុំស្រដៀងគ្នានៅទីក្រុងប៉ារីសកាលពីចុងសប្តាហ៍មុន។
ត្រាំនិង JD Vance បានចោទប្រកាន់សេឡេនស្គីថាមិនដឹងគុណចំពោះជំនួយយោធាអាមេរិក ចំពោះ “ការលេងល្បែងស៊ីសងជាមួយជីវិតមនុស្សរាប់លាននាក់” និងប្រឈមនឹង “សង្គ្រាមលោកលើកទី ៣” ដោយការប្រយុទ្ធប្រឆាំងនឹងកងទ័ពឈ្លានពានរុស្ស៊ីនៅក្នុងប្រទេសរបស់លោក។
ទិដ្ឋភាពទាំងនេះគឺជាសុបិនអាក្រក់បំផុតរបស់អឺរ៉ុប។ “គ្មាននរណាម្នាក់ចង់ឃើញរឿងបែបនោះទេ” ស្តាមើរបានប្រាប់ BBC នៅថ្ងៃអាទិត្យ។
មួយថ្ងៃមុនការឈ្លោះប្រកែកគ្នា ស្តាមើរដែលមានទំនាក់ទំនងជិតស្និទ្ធបានធ្វើឱ្យត្រាំដកយកពាក្យសម្តីមិនពិតមុនៗរបស់គាត់ដែលថាសេឡេនស្គីជា “អ្នកផ្តាច់ការ” បង្ហាញពី “ការគោរព” ចំពោះមេដឹកនាំអ៊ុយក្រែន និងលើកឡើងពីលទ្ធភាពដែលអ៊ុយក្រែននឹងទទួលបានមកវិញនូវទឹកដីដែលត្រូវបានកាន់កាប់ពីរុស្ស៊ីក្នុងកិច្ចព្រមព្រៀងឈប់បាញ់។ ពាក្យសម្តីទាំងនោះគឺជាការផ្លាស់ប្តូរគួរឱ្យកត់សម្គាល់ពីត្រាំ និងហាក់ដូចជាកំណត់តុបានល្អសម្រាប់ដំណើរទស្សនកិច្ចរបស់សេឡេនស្គី។
ឥឡូវនេះ អឺរ៉ុបកំពុងចាប់ផ្តើមពីចំណុចដំបូងម្តងទៀត។
“បីឆ្នាំបន្ទាប់ពីការឈ្លានពានយ៉ាងឃោរឃៅរបស់រុស្ស៊ីលើអ៊ុយក្រែន យើងឈរនៅចំណុចបត់បែនមួយ។ ថ្ងៃនេះខ្ញុំនឹងបញ្ជាក់ឡើងវិញនូវការគាំទ្ររបស់ខ្ញុំដែលមិនអាចបង្គោចបាន ចំពោះអ៊ុយក្រែន និងពង្រឹងការប្តេជ្ញាចិត្តរបស់ខ្ញុំដើម្បីផ្តល់សមត្ថភាព ការបណ្តុះបណ្តាល និងជំនួយដល់អ៊ុយក្រែន ដោយដាក់វានៅក្នុងស្ថានភាពដែលអាចទៅរួចខ្លាំងបំផុត” ស្តាមើរបាននិយាយក្នុងសេចក្តីថ្លែងការណ៍មួយមុនពេលកិច្ចប្រជុំកំពូលនៅទីក្រុងឡុងដ៍។
“ក្នុងភាពជាដៃគូជាមួយសម្ព័ន្ធមិត្តរបស់យើង យើងត្រូវតែពង្រឹងការត្រៀមខ្លួនរបស់យើងសម្រាប់ធាតុអឺរ៉ុបនៃការធានាសន្តិសុខ ជាមួយនឹងការពិភាក្សាជាបន្តបន្ទាប់ជាមួយសហរដ្ឋអាមេរិក” លោកបាននិយាយ។ “ឥឡូវនេះគឺជាពេលដែលយើងត្រូវរួបរួមគ្នាដើម្បីធានានូវលទ្ធផលល្អបំផុតសម្រាប់អ៊ុយក្រែន ការពារសន្តិសុខអឺរ៉ុប និងធានាអនាគតរួមរបស់យើង។”
កិច្ចប្រជុំកំពូលនឹងមានគោលដៅបី ដោយយោងតាមទីស្ដីការនាយករដ្ឋមន្ត្រី Downing Street៖ តម្រូវការរយៈពេលខ្លីរបស់អ៊ុយក្រែន ការធានានូវ “កិច្ចព្រមព្រៀងដែលមាននិរន្តរភាព” ដើម្បីបញ្ចប់ជម្លោះ និង “ការរៀបចំផែនការសម្រាប់ការធានាសន្តិសុខដ៏រឹងមាំ”។
ខណៈពេលដែលមេដឹកនាំអឺរ៉ុបបានប្រញាប់ប្រញាល់ក្នុងការបញ្ជាក់ឡើងវិញនូវការគាំទ្ររបស់ពួកគេចំពោះសេឡេនស្គីនៅល្ងាចថ្ងៃសុក្រ ស្តាមើរមានភាពស្ងៀមស្ងាត់គួរឱ្យកត់សម្គាល់។ ពីរបីម៉ោងក្រោយមក យើងបានដឹងថាហេតុអ្វី៖ Downing Street បាននិយាយថាលោកបាននិយាយជាមួយត្រាំនិងសេឡេនស្គីបន្ទាប់ពីការជួបប្រទះដ៏តានតឹងរបស់ពួកគេ។ “លោកនៅតែរក្សាការគាំទ្ររបស់លោកដែលមិនអាចបង្គោចបានចំពោះអ៊ុយក្រែន និងកំពុងដើរតួនាទីរបស់លោកក្នុងការស្វែងរកមាគ៌ាឆ្ពោះទៅមុខទៅរកសន្តិភាពដែលមាននិរន្តរភាព ដោយផ្អែកលើអធិបតេយ្យភាពនិងសន្តិសុខសម្រាប់អ៊ុយក្រែន” អ្នកនាំពាក្យរបស់ស្តាមើរបាននិយាយ។
តួនាទីជាអន្តរការីរវាងអឺរ៉ុបនិងសេតវិមានគឺជាតួនាទីមួយដែលស្តាមើរយកចិត្តទុកដាក់យ៉ាងខ្លាំង ទោះបីជា ប្រហែលជាជាពិសេស នៅពេលដែលវាហាក់ដូចជាអសារឃ្មឹងក៏ដោយ។ វាគឺជាតួនាទីមួយដែលលោកនឹងសង្ឃឹមថាអាចទទួលបានផលនៅចុងសប្តាហ៍នេះ ប៉ុន្តែអារម្មណ៍អស់សង្ឃឹមដែលកើនឡើងកំពុងកើតមាន។
យ៉ារូស្លាវ សេឡេសនីអាក់ សមាជិកសភាអ៊ុយក្រែនម្នាក់ បានសរសេរនៅលើ Telegram មុនពេលកិច្ចប្រជុំនៅទីក្រុងឡុងដ៍ថា៖ “ប្រសិនបើអ្នកគិតថាស្ថានភាពនឹងកែលម្អឡើងដោយអព្ភូតហេតុនៅថ្ងៃនេះ… កុំរំពឹងលើវា។”
ប្រភព៖ CNN
